Inruaren ti Asian Network for Free Elections (ANFREL) ti interim reportna maipapan iti obserbasionda iti 2025 Philippine midterm elections.
Iti maysa a programa idi kalman, indatag ni ANFREL Chairperson Rohana Hettiarachchie ken uppat pay nga “observers” dagiti natakuatanda nu sadinno ti kangrunaan a nakitada ket ti panangabuso kadagiti state resources ken panaggatang iti botos.
Sigun kenni Hettiarachchie, ti panangabuso kadagiti state resources ken panaggatang iti botos ket maibilbilang kas “disturbing factors” iti eleksion.
Gapu iti nasao a banag, inrekomendar ni Hettiarachchie ti pannakaipatungpal ti campaign finance ceiling.
Sigun met kenni Khoirunnisa Nur Agustyati, maysa kadagiti ANFREL panelists, ti panangabuso kadagiti state resources ken panaggatang iti botos ket saan laeng a napasamak bayat ti panagkakampanya nu diket napasamak sakbay ken kalpasan ti eleksion.
Kinunana a mabalin a kasla normal ti nasao a banag para kadagiti tattao gaputa mapaspasamak daytoy kadagiti panawen a kas iti panangrugi ti proseso ti panagbadyet.
