BAGUIO CITY – Nagbalin a generally peaceful wenno naannayas ti obserbasyon ti Aldaw dagiti Minatay iti rehiyon Cordillera.
Impannakkel daytoy ni Police Regional Office Cordillera (PROCOR) Public Information Officer PCapt. Marnie Abellanida iti panakiuman ti Bombo Radyo Baguio.
Sigun kenkuana, maituloy latta ti nairtengan a panagwanawan ti PROCOR nangruna kadagiti border checkpoints ken kadagiti kamposanto agingga a malpas ti restrictions kadagitoy.
Innayonna nga agtultuloy met ti panakaiwaras ti kanayunan a pwersa dagitoy kadagiti terminal, sementeryo ken dadduma pay a parapubliko a lugar kagiddan met ti panaglukat ti borders ti Baguio kadagiti fully vaccinated a turista.
Kabayatanna, imbinglay pay ni PCapt. Abellanida nga agtultuloy met ti nairtengan a panagpatrolya ken panagwanawan dagiti pulis kadagiti checkpoints paruar ken pastrek iti siudad tapnu maliklikan ti panakaiserrek dagiti iligal a droga ken kontrabando.
Dinakamatna nga agtultuloy ti nagduduma pay nga operasyon dagitoy tapnu maipasigurado ti natalged a panakaipatungpal ti eleksion iti rehiyon.
