BAGUIO CITY – Masurot latta kadagiti simbaan katolika iti lokalidad ti paglintegan a naipatungpal iti napalabas a tawen kabayatan ti panaka-obserbar ti Ash Wednesday inton bigat.
Iti Our Lady of the Atonement Cathedral wenno Baguio Cathedral, maipatungpal ti 30 percent capacity tunggal misa.
Maisayangkat ti walo a misa inton bigat, partikular iti 6:30, 7:30 ken 10:00 iti agsapa ken iti 12:15, 2:00, 3:00 ken 5:15 iti malem bayat a maudi ti 6:00 iti rabii.
Maipalagip a ti 2:00 PM ket ti tradisyonal a latin mass iti Holy Face Chapel bayat nga iti 10:00 AM ket agsermon ni Bishop Victor Bendico.
Saan met a maipulagid iti muging ti deboto ti dapo ngem ketdi, isapri daytoy ti padi kas maitunos iti pagalagadan nga impaulog ti Vatican.
Maikalkalikagum metlaeng ti panakasurot dagiti kangrunaan a health and safety protocols kadagiti panagsuot iti facemask ken face shield ken ti panagsurot iti social distancing.
