BAGUIO CITY–Indauluan ni Baguio City Mayor Benjamin Magalong ti occular inspection kadagiti rainwater catchment basin sadiay Mt. Santo Thomas tapnu maberipikar dagiti report iti pasilidad a dumanonen iti kritikal ken nababa ti level ti danom.
Malaksid pay ditoy ti maatap a panagaramat dagiti mannalon iti danom a posible nga agpangta iti kinadalus ti danom sadiay.
Immunan a nagballakad ni Mayor Magalong iti posibilidad nga agkurang ti danom ditoy siudad kalpasan a makitada a dandanin a maawanan iti danom ti catchment basin sadiay Sto. thomas.
Maibasar iti report, dimmanon iti 0.70 meters ti lebel ti danom iti nasao a catchment nu sadinno nababa unay daytoy iti 12.46 meters nga maximum level iti normal nga lebel ti danom sadiay.
Gapu iti daytoy, umap-apela manen ti local chief executive iti publiko tapnu agsalimetmet iti panagaramat ti danom.
Malaksid iti dayta, napagnumoan dagiti opisyal a karaman iti inspection ti panakaisayangkat iti binulan a panagkolektar ken test samples ti danom manipod iti catchment basin ken iti aglawlaw daytoy tapnu maduktalan ti posibilidad a kontaminado daytoy.
Kabayatanna, immunan nga inwaragawag ti lokal a gobierno nga naakaalada iti P90-M a pondo manipod iti the Department of Budget and Management para iti panakaipasdek ti rainwater harvesting facility iti paset ti Camp 8 sadiay Kennon Road tapnu manayunan ti containtment area ken masolbar ti posibilidad iti kinakurang ti danom ditoy siudad.