Imbinglay ni Engr. Jose Ignacio V. Valera, Disaster Risk Reduction and Management Division Chief ti Office of the Civil Defense-Cordillera a mannarimaan ti monitoringda kadagiti epekto ti naglabas a Bagyong Luis iti rehiyon.
Iti pannakiuman ti Bombo Radyo kenkuana, imbinglayna nga ongoing pay laeng ti panangupdate dagiti nagduduma a local government units iti rehiyon babaen metlaeng iti Department of Social Welfare and Development.
Innayonna a babaen metlaeng iti pannakikoordinarda iti DPWH, awan met ti nakitada a panangreggay kadagiti major highways iti rehiyon numan pay ada dagiti landslides iti dadduma a kalsada kadagiti probinsya.
Kagidan dayta, imbinglay ni Engr. Valera a nasaysayaat ita ti pannakikoordinar dagiti lokal a gobyerno iti rehiyon iti opisinada ken adadda a nagbalin dagitoy a proactive.
Kagidan dayta, nagpallagip daytoy iti publiko nga aganad ken panangipangpangruna iti seguridad tapno maliklikan dagiti saan a nasayaat a pasamak. Malaksid iti dayta, binalakadan na metlaeng ti publiko a kanayunda kuma nga agbalin nga updated kadagiti advisory ken pakaammo dagiti nagduduma nga ahensya ken opisina ti gobyerno ken planoenda a nasayaat ti panagbyahe da nangnangruna ta ada dagiti kalkalsada iti rehiyon nga agingga ita ket nakarikep pay laeng. //bombokaren.c.sapirao
