Agtaltalinaed paylaeng ni Office of the Vice President (OVP) chief of staff ken undersecretary Zuleika Lopez iti Veterans Memorial Medical Center (VMMC) idiay Quezon City gapu iti “humanitarian reasons.”
Sigun kenni House of Representatives Secretary General Reginald Velasco, pinatganda ni Lopez iti nasao nga ospital gaputa prayoridad ti House of Representatives ti salun-at ken kinatalged, kasaruno ti panngepda kuma a maiyakar ni Lopez iti Women’s Correctional Facility idiay Mandaluyong City.
Ni Lopez ket na-cite in contempt gapu iti mapapati nga “undue interference” ti imbestigasion dagiti mammanday-linteg iti panagaramat ti confidential funds ti opisina ni Vice President Sara Duterte.
Ti pannakaibaludna ket agingga ita nga aldaw.
Idi laeng Biernes ti tengga ti rabii, nagdesision ti Committee on Good Government and Public Accountability a maiyakar ni Lopez iti correctional facility, ngem ti pannakaimplentar ket nilapdan ni Vice President Duterte, sigun kenni Velasco.
Immunan a kinuna ni Vice President Sara a ti panggepda a pannakaiyakar ni Lopez iti Correctional Institution for Womenket “attempted homicide,” gaputa maamak daytoy iti biagna ta mariribukan no makakita iti uniporme ti polis.
Nagsangit pay ni Lopez iti virtual press conference iti ala-una ti agsapa idi Sabado bayat ti panangipeksana ti pakaseknanna maipapan ti pannakaiyakarna manipid iti House detention facility kagiddan ti panangibagana a pangta daytoy ti biagna.
Iti biang ti House of Representatives, kinunada nga agtaltalinaed ti ligal a karbengan ti amin a balud, ken dagiti personnelda ti timmulong iti iseserrek dagiti healthcare professionals tapno maipasigurado ti kinatged ken pagimbagan ni Lopez.
