Agtultuloy a maipatpatungpal dagiti offsite registrations ti Commission on Elections (COMELEC)-Baguio City para iti 2025 national ken local elections.
Iti panakiuman ti Bombo Radyo kenni Atty. John Paul Martin, Commission on Election Officer (COMELEC) iti siudad ti Baguio, kinunana nga idi napalabas a lawas ket napasamak ti offsite elections sadiay Guisad ken Dominican bayat nga inton umay a Biyernes, Mayo a dies ket mapasamak daytoy sadiay Irisan; inton Sabado, Mayo a onse ket maipatungpal sadiay Lucban Elementary School; inton Mayo dise syete sadiay Pacdal; Mayo dise otso sadiay Santo Tomas Proper; Mayo baente kwatro sadiay Middle Quezon Hill ken inton Mayo baente singko ket sadiay Loakan Proper.
Para iti bulan ti Agosto ken Setyembre, manamnama a maangay ti offsite registration iti kadakellan a mall iti siudad ti Baguio.
Sigun kenni Martin, agpatingga ti registration inton Setyembre trenta ti agdama a tawen.
Para iti umadanin a 2025 national ken local elections, kinuna ni Martin a maaramat ladta dagiti pampribado a pagadalan para iti eleksyon gapu ta adda dagiti paset iti siudad nga awanan iti parapubliko a pagadalan.
Gapu iti dayta, agyamyaman ti Commission on Elections kadagiti pampribado a pagadalan a makikokoordinar kadagitoy tunggal eleksyon nangruna ket free-of-charge dagitoy.
Kabayatanna, kinuna ni Martin nga awan pay ti naaw-awat dagitoy nga opisyal a resolusyon maipapan iti panggep ni Chairperson Commission on Elections (COMELEC) George Erwin Mojica Garcia a pabassiten ti aldaw ti substitution dagiti kandidato gapu iti withdrawal.
Sigun kenni Garcia, adda ti tallo a wagas wenno rason tapno masubstitute wenno masukatan ti maysa a kandidato.
Daytoy ket babaen ti ipupusay ti kandidato, diskwalipikasyon wenno withdrawal.
No pay kasta, kinuna ti Commission on Election Officer ti siudad nga agbalbalin a taktika dagiti kandidato ti withdrawal kas panagsiim wenno panangkita no siasinu dagiti agbalin a kalabanda.
Ngem, impeksa ti opisyal a nasken a saan nga usaren ti withrawal kas substitution para iti umadanin a 2025 national ken local elections tapno saan a mariro dagiti botante ken tapno maamoanda no siasinu dagiti kandidato a pagpilienda para iti eleksyon.//M
