BAGUIO CITY – Naipaayanen iti tulong ti sumagmamano nga OFWs sadiay Oman a nagkuna a maminsan laengen iti maysa nga aldaw a mangmangan dagitoy.
Immuna iti daytoy, nakaawat iti reklamo ti Bombo Radyo Cauayan manipud iti OFW a ni Joel Agustin manipud Nueva Ecija ken waiter sadiay Oman ken kinunana a saanen dagitoy a mangmangan iti agsapa ken aldaw ken iti laeng rabii dagitoy a mangmangan.
Kinuna ti nasao nga OFW nga awan ti tulong a naawatda manipud iti embahada ti Pilipinas.
Nupay kasta, iti interbyu ti Bombo Radyo-Baguio kenni Labor Attaché Atty. Gregorio Abalos Jr. iti Philippine Overseas Labor Office (POLO) sadiay Muscat, Oman, kinunana a natulunganen ti nasao nga OFW ken dagiti kakadwa daytoy babaen iti Bombo Radyo.
Kinunana a naammuan ti POLO ti parikot ti nasao nga OFW babaen iti report ti Bombo Radyo.
Nagpalawag met daytoy iti panakaladaw ti panakaipaay ti tulong iti nasao nga OFW ken kadagiti kakadwana.
Sigun kenni Abalos, agnanaed sadiay Salalah, Oman ti nasao nga OFW ken adayo unay ti nasao a lugar a madanon kalpasan ti maysa nga oras ken tallo pulo a minutos a biahe babaen iti eroplano.
Dinakamatna pay a nakasaritana a mismo ni Agustin ken naipaayanen daytoy ken dagiti kakadwana iti relief packs ken maipoproseso ti aplikasionda iti Abot Kamay ang Pagtulong (AKAP) program ti DOLE.
