BAGUIO CITY – Na-stranded ti ginasgasut a dadakkel a lugan gapu iti pannakabaliktad ti oil tanker iti deppaar ti Marcos Highway sadiay Poblacion, Tuba, Benguet idi kalman.
Sigun kenni PCI James Acod, hepe ti Tuba PNP, pasang-at ti nasao a tanker a naglaon iti 14,000 litro ti krudo idi nadungpar daytoy ti dakkel a trak a pasalog iti kalsada.
Nangitunda daytoy iti panangdungpar met ti nasao a tanker iti bus nga adda iti likudanna a paturong metlaeng iti siudad ti Baguio.
Nabigbig ti driver ti oil tanker a ni Avelino Apidos, 40-anyos, naasawan ken residente ti Itogon, Benguet; ti driver ti trak a ni Eugene Picardo, 40-anyos, naasawan ken residente metlaeng ti Itogon, Benguet bayat a ti driver ti Victory Liner Bus ket nabigbig a ni Marlon Cacho, 37-anyos ken residente ti Santa Barbara, Pangasinan.
Sigun kenni Acod, nadangran iti aksidente ti driver ti tanker ken naiturong daytoy iti ospital ngem dagus met laeng a napaawid bayat a saan met a naan-ano ti dadduma nga indibidual a nairaman iti aksidente.
Kinunana a nagresulta ti nasao nga aksidente iti panaka-stranded dagiti dadakkel a lugan a paturong ken paruar iti siudad ti Baguio gaputa uray idi naipaigid ti tanker ket saan latta a makalabas dagiti lugan gapu iti nagalis a kalsada kalpasan a nagubo ti krudo iti makina ti tanker.
Sigun iti Tuba PNP, kangrunaan pay laeng a rason iti nasao nga aksidente ti kinagalis ti kalsada gapu iti napasaran a tudo idi kalman.
