Manamnama a personal nga agturong ni Ombudsman Jesus Crispin Remulla iti rehion Cordillera tapno sukimaten dagiti mapapati a korapsion nga adda pakainaiganna iti ‘rocknetting’ ken dadduma pay a public works projects, kasaruno ti damag a sobra unay a presyo ken iregularidad.
Sigun kenni Remulla, kayatna a makipagsinnarak kenni Baguio City Mayor Benjamin Magalong tapno kitaen dagiti ebidensia ti rocknetting.
Kinunana a napateg a maimatanganna amin dagitoy.
Immunan nga imbutaktak ni Mayor Magalong idi napalpalabas a bulan dagiti nadadael ken mapapati nga overpriced a rock netting a proyekto iti rehion, ken ti kwestunable a panaggatang kadagiti solar lights, roller barrier systems, ken solar cat’s eye reflective safety devices.
Guyguyuguyen ni Remulla ti publiko nga aganus gaputa imbestigaran ti opisinana ti naipadamag nga isyu ti korapsion.
