Kinumpirmar iti Office of the Ombudsman nga agdama a mangipatpatungpal ti fact-finding investigation kadagiti reklamo a plunder, graft, ken malversation nga impila ni sigud a Senador Antonio Trillanes IV kontra kenni Vice President Sara Duterte.
Sigun kenni Assistant Ombudsman Mico Clavano, maiyakar ti kaso iti preliminary investigation kalpasan ti fact-finding stage.
Karaman kadagiti pammabasol ti mapapati a panagaramat iti bilion a pisos a confidential funds iti Office of the Vice President ken iti Department of Education, kasta metlaeng ti dadduma pay nga isyu iti pondo idi daytoy ti mayor iti Davao City ken secretary iti Department of Education.
Nadakamat metlaeng iti reklamo ti mapapati nga iregularidad iti laptops, unliquidated cash advances, ken saan a nasayaat a deklarasion iti kinabaknang ti bise presidente.
Kinuna metlaeng iti Ombudsman nga adalenda pay nu sadinno ti pangibagaanda ti kaso gaputa ni VP Sara ket maysa nga impeachable official.
Agtultuloy metlaeng ti panagmonitor iti ahensia kadagiti posible a baro a testimonia seknan iti reklamo.
