Patien ni Baguio City Mayor Benjamin Magalong a dagiti pagannurotan ket masapul a tungpalen dagiti agbiyahe a taxi iti siudad, nangruna ti panangipatungpal iti one-in, one-out policy tapno maliklikan ti kanayunan a bilang dagiti taxi ken mapabassit ti traffic congestion.
Sigun kenni Mayor Magalong, masapul a maipatungpal ti nasao a polisiya tapno saan nga agtultuloy ti panagserrek dagiti baro a taxi iti siudad.
Inlawlawag ti Mayor a maysa daytoy kadagiti wagas tapno makontrol ti bilang dagiti taxi nga agserbi iti publiko, nangruna ket limitado ti espasyo dagiti kalsada iti siudad.
Nagpalagip ni Magalong a dagiti baro a taxi a maipalubos a sumrek iti siudad ket masapul nga electric vehicle (EV) wenno hybrid vehicle, imbes a dagiti agar-aramat iti gasolina ken Diesel-powered a lugan.
Daytoy ti kiddaw ti lokal a gobierno iti Land Transportation Franchising and Regulatory Board (LTFRB), a mangipakita iti panangipangpangruna ti siudad iti nasaysayaat ken nasustenir a sistema ti transportasyon.
Kinuna pay ti Mayor a masapul a maimatangan ti nagdakkel a nagdumaan ti bilang dagiti public utility jeepney ken taxi nga agdaldaliasat iti siudad.
Maibasar iti datos, agarup 8% laeng ti jeepney iti bilang dagiti parapubliko a lugan, bayat a dunanon iti 42% dagiti taxi.
Gapu iti daytoy, panggep ti lokal a gobierno a maurnos ti bilang dagiti taxi tapno saan a mapukaw ti balanse ti sistema ti transportasyon ken maipangpangruna ti serbisio dagiti public utility jeepney a maysa kadagiti kangrunaan a paglugluganan iti inaldaw a panagbiahe.
Maipalagip a ti panagnayon dagiti taxi iti siudad ket maysa kadagiti pakaseknan ti lokal a gobierno gapu iti limitado a road capacity ken trapiko, nangruna kadagiti kangrunaan a pagturongan iti siudad.
Gapu iti daytoy, impaganetget manen ni Magalong a masapul a matungpal ti one-in, one-out policy ken dagiti pagannurotan para kadagiti baro a taxi tapno masigurado ti nasayaat, natalged ken nasustiner a sistema ti transportasyon iti siudad.
Kabayatanna, ipalpalagip ti lokal a gobierno a saan laeng a ti panagnayon kadagiti parapubliko a lugan ti masapul a maimatangan, no di ket ti umno a panangituray iti bilang ken kita dagiti lugan a sumerserbi iti publiko.//Bombo Khey Reparip
