BAGUIO CITY – Iyap-apela manen ti Social Security System (SSS) – North Luzon 1 Division ti panakitransaksion ti publiko kadakuada babaen iti ONLINE ita nga adda ti pandemya.
Iti interview ti Bombo Radyo Baguio, imbinglay ni Christian Andrew Rillorta, Regional Communications Officer ti nasao nga opisina a naduktalanda a dagiti transaksion ti kagudua kadagiti agturturong kadagiti opisina ti SSS ket mabalin a naaramid babaen iti internet wenno iti online.
Kinunana nga ita ket mabalinen a maitransaksion iti online babaen iti sss.gov.ph dagiti kaaduan a transaksion iti SSS kas iti aplikasyon iti salary loan, calamity loan, maternity benefit, funeral benefit, retirement benefit ken dagiti agala ti SSS number.
Inyunay-unayna a no mabalin ket dagiti laeng mapalubusan nga agturong wenno maakomodar kadagiti opisina ti SSS ket dagiti agsumitir kadagiti dokumento para iti death benefit, agala ti UMID ID, dagiti awanan ti internet ken dagiti apan agbayad ti salary loan ken calamity loan.
Inyunay-unayna met kadagiti senior citizens a saanen a kasapulan ti panagturongda iti SSS-Baguio tapnu agtulnog laeng iti Annual Confirmation of Pensioners (ACOP) gaputa nasuspindir daytoy.
Inlawlawag ni Rillorta a saanen a kasapulan ti ACOP kadagiti senior citizens nangruna no awan sardeng wenno regular ti panagpensionda.
Inaklonna a nagbalin a pakaseknanda ti panagturong iti opisinada dagiti senior citizens ditoy lokalidad tapnu laeng makasurot iti ACOP iti baet a maipawil ti panagruar dagitoy iti babbalayda gapu iti kinarisgoda iti COVID-19.
