Binabalaw ti House prosecution panel ti panangipapilit ti sumagmamano a senador ti pannakaaramat ti online participation apaman a mangrugi ti impeachment trial kontra kenni Vice President Sara Duterte.
Inawagan pay ni House trial spokesperson, Rep. Zia Alonto Adiong ti nasao a sistema kas ‘zoom impeachment” a sigun kenkuana ket posible a mangpakapsot iti talek ti publiko nu mapalubosan daytoy.
Impetteng pay ni Representative Adiong a rumbeng a saan a palubosan ti Senate leadership dagiti senador a makipaset ken agbutos babaen iti online nangnangruna iti impeachment proceedings.
Sigun kenni Representative Adion, napateg ti pisikal a presensya dagiti senador iti maysa nga impeachment trial gaputa kasapulan a personalda met a mangngegan dagiti testimonya ken personalda a sukimaten dagiti ebidensya.
Babaen iti presensyada, adadda a maobserbaran dagiti garaw ken panagsarita dagiti testigo kabayatan kadagiti cross examination iti trial.
Maipalagip nga immunan nga insingasing ti majority bloc ti senado ti panangipalubos iti panagaramat iti online participation ngem binabalaw daytoy dagiti miyembro ti minority bloc. //bombokaren.c.sapirao
