BAGUIO CITY – Naisayangkat ti emergency meeting ti Inter-agency Task Force Kennon babaen iti panangidaulo ni Cordillera Regional DRRM Council chairperson ken Office of the Civil Defense – Cordillera Regional Director Albert Mogol.
Para daytoy iti panaka-aksion ti kiddaw ni Baguio City Mayor Benjamin Magalong a panakaipaay ti open window para iti Kennon Road tapnu mailukat daytoy kabayatan ti weekends a kadawyan nga umaduan dagiti turista a sumang-at iti siudad.
Tarigagay ti kiddaw ti mayor a maksayan ti nailet wenno nadagsen a trapiko iti deppaar ti Marcos Highway ken iti Tubao – Asin -Nangalisan Road tunggal weekend.
Iti rekomendasyon ti DPWH ken PNP ken iti panangaprobar ti Task Force, maikulat ti Kennon Road manipud alas sais ti rabii ita nga aldaw ti Biyernes, November 22 agingga iti alas sais ti rabii inton Lunes, November 25.
Mailukat ti Kennon Road iti one-way upward direction wenno iti paturong iti Baguio City kadagiti nalalag-an a lugan wenno dagiti agdagsen iti lima a tonelada nga agpababa.
Nabalakadan met dagiti pribado a lugan a mangaramat iti Kennon Road iti panag-obserbar dagitoy iti 20 kilometer per hour nga speed limit ken kadagiti linteg trapiko nangruna iti panagsardeng dagitoy iti nalatak a Lion’s Head.
Naibalakad met ti panagtalinaed dagiti pribado a lugan iti pasang-at a linya ti kalsada gaputa adda dagiti lugan dagiti residente iti Kennon Road nga agar-aramat iti pasalog a linya ti kalsada.
Napagnumuan pay nga amin a turista nga adda ditoy Baguio ngem kayatda ti apan iti Lion’s Head tapnu agala ti ladawan ket nasken nga agalada ti pammalubos iti checkpoint sadiay Camp 8 Viewdeck.
