BAGUIO CITY- Maipadas ti panagbiahe ti dua a HOHO Tourist Bus mangrugi ita nga aldaw agingga inton Dominggo.
Paset daytoy ti programa ken serbisio nga idiaya ti City Tourism Office ken Baguio Tourism Council tapno maipaayan ti libre a pagluganan dagiti turista a nakarehistro iti VISITA App ken dagiti addaan ti QTP paturong kadagiti nagduduma a pagpasyaran iti siudad.
Ti umuna a trip ket mangrugi iti alas 8:30 ti agsapa bayat a ti maudi a trip ket iti alas 4:30 ti malem.
Agbalin nga staging area ti Convention Center paturong kadagiti pito a tourist destination kas ti Botanical Garden, The Mansion, Mines View Park, Wright Park ken Governor Pack.
Immuna metten nga inlawlawag ti City Tourism Office a babaen iti libre a tourist bus ket maguyugoy dagiti turista a mangiparada iti luganda kadagiti pagdagusanda nga accomodation establishement.
Babaen iti daytoy ket maksayan ti bilang dagiti lugan a dumalyasat kadagiti kalsada a makatulong iti pannakakessay ti nailet a gunay ti trapiko a maysa ita kadagiti pakaseknan iti Baguio City.
