BAGUIO CITY – Nakaawat iti nagduduma a pammabalaw ti operasyon iti impounding area para iti aso ti City Veterinary and Agriculture Office (CVAO) ti Baguio City.
Iti session iti lokal a konseho, imbinsa-binsa ni Lovely Tuazon, panakabagi ti Dog Animal Community ti Baguio dagiti obserbasyon ken tarigagayda a mabaliwan iti operasyon ti nasao nga impounding area.
Karaman kadagiti dinakamatna ti saan a panakaipalubos ti panagala ti ladawan kadagiti aso ken ti panakaikarga ti CCTV camera iti impounding area para iti nainget a monitoring kadagiti aso.
Impeksana pay dagiti sumagmamano a reklamo kas iti panakabaybay-an dagiti aso iti impounding area.
Inlawlawagna a tarigagayda nga agala ti ladawan dagiti amin nga aso iti impounding area tapnu napartak ti panaka-adaptar dagitoy ken maliklikan a mabaybay-an dagiti aso agingga a maipasidong iti euthanasia.
Nupay kasta, nainget a tinubngar daytoy ni Dr. Gillardo Bisted, panakabagi ti CVAO.
Inlawlawagna a dagiti laeng personnel ti CVAO ti mabalin nga agala iti ladawan dagiti aso wenno masapol nga agala ti pammalubos manipod kadakuada dagiti agala ti ladawan.
Kinuna ni Bisted nga adda ti pagalagadan a sursurutenda iti panakaipalubos ti panagala ti ladawan kadagiti aso kas iti scientific purposes nangruna ta adda ti bukodda a posting iti social media.
Dinakamatna pay a regular ti panangipablaakda kadagiti ladawan dagiti aso a mabalin a ma-ampon.
Impaganetget met ni Tuazon nga awan ti makitada a post ti CVAO ken mapilpili laeng dagiti mai-post a ladawan dagiti aso.
Nagbalin pay a nabara ti diskusyon kalpasan nga impetteng ni Bised nga awan ti makitada a rason ken importansia tapnu mai-post amin a ladawan dagiti aso a matiliw dagitoy.
Impetteng ni Tuazon a babaen ti panangipablaakda iti social media ket nalaklaka a mabigbig dagiti dog owners dagiti aso ken naparpartak iti panag-claim kadagitoy.
Kinunana a babaen iti daytoy ket maliklikan nga agsakit dagiti aso ken maurong iti impounding area nangruna ta mamati daytoy nga amin nga aso ket addaan ti owner.
Mainaig pay iti dayta, kinuna ni Tuazon a sidadaanda a mangbaklay iti gastos para iti panakaimuntar ti CCTV camerias iti impounding area tapnu maipasiguro ti umno a panagtaraken kadagiti aso.
