Agtultuloy ti imbistigasyon dagiti pulis idiay Tabuk City seknan iti robbery incident a nakatayan ti gold-buyer sadiay.
Iti pannakiuman ti Bombo Radyo kenni PMSg Prudencio Atas, information officer ti Tabuk City Police Station, kinunana a napasamak ti robbery incident iti oras ti alas nuebe y media iti agsapa idi laeng kalman ngem naireport kadakuada daytoy iti oras ti alas dies y media iti metlaeng agsapa.
Nabigbig ti biktima a ni John Manaig Cabbigat, agtawen iti tallo pulo, awanan asawa, maysa a gold buyer ken residente idiay Purok 5, Bulanao, Tabuk City.
Maibasar iti inisyal nga imbistigasyon dagiti otoridad napasamak ti pammaltog kalpasan a plinano dagiti suspek nga agtakaw iti pwesto ti nasao a biktima.
Sigun kenni Atas, imbaga ti kabsat ti biktima nga adda ti tallo nga indibidual a simmek iti pwestoda no sadino dua kadagitoy ti sinumrek iti shop bayat a nagserbi met kas lookout iti ruar ti maysa a kaduada.
Inladawan met ti kabsat ti biktima a maysa kadagiti suspek ket nakakawes iti nagisit a t-shirts ken pantalon bayat a dagiti dua ket nakakawes iti tactical pants.
Kinunana ni Atas a napasamak daytoy kalpasan a tinutukan ti maysa a suspek ti biktima iti paltog rason a nagkiddaw met iti tulong.
Nupay kasta, dagus a pinaltogan daytoy ti suspek rason a nagsagrap daytoy iti tama ti paltog iti makinkanigid nga abagana ngem rinumwar ti bala ti paltog iti makinnawan nga abaga daytoy.
Malaksid iti dayta, pinadas pay dagiti suspek a paltogan ti kabsat ti biktima ngem nagmalfunction ti paltog daytoy rason a dagus a timmaray tapno agkiddaw iti tulong bayat a nagtaray metlaeng dagiti suspek tapno aglibas.
Naitaray met a dagus ni Cabbigat iti pagagasan ngem indeklara ti attending physician daytoy a pimmusay.
Gapu iti dayta, kidkiddawen ni Atas iti publiko nangruna kadagiti nakakita iti napasamak nga insidente tapno ireport a dagus kadakuada ti pakabigbigan dagiti suspek.
Impasiguradona a saan nga agbuteng dagitoy nga agreport kadakuada.
Nagpalagip metlaeng daytoy kadagiti negosyante nga agikarga iti high definition CCTV, ken ikarga ti hotline numbers dagiti maseknan nga otoridad kadagiti pwestoda.
Iti agdama, nakairekord ti Tabuk City Police Station iti uppat nga insidente ti pammaltog manipud enero agingga idi laeng kalman.
