BAGUIO CITY– Nainget a bambantayan ti lokal a gobierno ti siudad ti Baguio dagiti iligal a talipapa ken business owners nga addaan operasyon ditoy lokalidad.
Sigun kenni Councilor Philian Weygan Allan, adda dagiti reklamo a naawat ti opisinana maipapan kadagiti talipapa ken pagtagilakuan nga agop-operate ngem awanan iti business permit.
Kinunana a manipud nangrugi ti community quarantine nga intunda ti mapaspasaran a pandemya ket immado dagiti aglaklako kadagiti igid ti kalsada ken iti merkado nga awanan iti kaskenan a dokumento.
Nupay dinakamatna a maawatana dagiti iligal vendors nga agbirok iti pagbiyagan ita a panawen ti krisis ket inyunay-unayna latta ti pakaseknan dagiti dadduma a negosyante nga agbaybayad iti buis.
Iti agdama ket manarimaan ti negosasyon ti konseho ti siudad tapno maipaayan iit solusyon ti panagado dagiti saan a rehistrado a business establishments ditoy lokalidad.
