photo ctto
BAGUIO CITY – Panggep dagiti opisyal ti lokal a gobyerno ti probinsia ti Benguet nga iyakar iti Department of Health (DOH) ti panakaimaton ti operasyon ti Benguet General Hospital (BeGH).
Nailanad iti resolusyon ti Sangguniang Panlalawigan a dumanon iti P40-M ti ipapaay a subsidiya ti provincial government para iti BeGH.
Nailanad nga iti kanito a maiyakar iti panakaimaton ti BeGH iti DOH ket mabalin a maiwaras ti nasao a pondo kadagiti innem a district hospitals iti probinsiya nga agkasapulan met laeng iti kanayunan a pasilidad.
Sigun pay kadagiti opisyal, ti nasao a singasing ket nagtaud met laeng kenni DOH Undersecretary Roger Tong-an.
Nupay kasta, impetteng dagiti provincial officials a saanda nga agdardaras iti nasao a panggep nangruna ta agingga ita ket agkurkurang paylaeng dagiti pasilidad iti BeGH pakairamanan dagiti nars ken dagiti doktor.
