BAGUIO CITY – Napalubosanen dagiti dadduma a ruta ti public utility jeepneys (PUJs) iti 16 a barangay sadiay La Trinidad, Benguet nga agserbi kas transportasyon dagiti residente a paruwar ken pastrek iti munsipyo.
Sigun kenni Mayor Romeo Salda, agtaltalinaed iti total lockdown ti munisipyo tunggal Domingo kas paset ti pagalagadan dagitoy kontra iti COVID-19.
Kinunana a ti pammalubos ti panagbiahe dagiti dadduma a jeepney ket tapnu matulongan dagiti umili nga agturturong ditoy Baguio City para iti essential needs dagitoy kas iti panagmisa ken dadduma pay.
Innayona nga inaprubaran ti Municipal Inter-Agency Task Force for the Management of Emerging and re-emerging infectious Diseases kalpasan a maamoanda ti petision dagiti residente kasta met dagiti jeepney drivers ken operators iti munisipyo.
Nupay kasta, impasigurado daytoy a nabilin dagiti jeepney drivers ken operators iti panakaipasigurado ti basic health protocols ti COVID-19.
Manarimaan met ti assessment ti traffic and transportation management task force ti munisipyo seknan iti trapiko sadiay tapnu maipatungpal dagiti adjusments ti manay-nayunan a panagbiahe dagiti lugan.
