BAGUIO CITY- Naituding a maisubli ti operasyon ti “Hop On, Hop Off” wenno ti HOHO bus inton Hulyo 15.
Ti nasao a private vehicles ket para kadagiti turista nga agturong iti Baguio City.
Sigun iti lokal a gobyerno, 50,000 agingga 60,000 a turista ti agbisbisita iti siudad tunggal lawas nu sadino 40,000 ti sumangsangbay manipud biyarnes agingga dominggo.
Sigun pay iti tourism office, ti 30,000 a bilang dagiti turista a sumangsang-at iti siudad tunggal aldaw ket mangituntunda iti nailet a gunay ti trapiko partikular sadiay Botanical Garden ken Mines View Park.
Impaganetget ni Tourism Officer Aloysius Mapalo a babaen iti initiabo ti Hoho bus ket maksayan ti nailet a gunay ti trapiko.
Inayonna a maksayan ti bilang dagiti agparparada a lugan kadagiti igid ti kalsada ken kadagiti parke.
Dinakamat ni Mapalo nga agrubwat iti Baguio Convention Center ti first trip iti 8:30 ti agsapa ken ti maudi a biahe ket alas sais baente ti rabii manipud Wright Park agingga Governor Pack Road kas dropoff point.
Inlawlawagna a dagiti turista nga aglugan iti HOHO bus ket bayadanda laeng ti parking fee ti luganda iti Baguio Convention Center.
Maaramat ti parking fee para iti operasyon, maintenance dagiti bus ken allowance dagiti drivers ken tour guides.
