BAGUIO CITY – Tubtubngaren dagiti umili sadiay Lubok, Balili, La Trinidad, Benguet ti operasyon ti maysa nga slaughterhouse sadiay.
Impasa dagiti barangay officials ti Balili ti resolusyon a mangipekpeksa iti panangtubngarda iti operasyon ti nasao a pagpartian a kas maibasar iti resulta ti insayangkatda a konsultasyon iti publiko.
Sigun kadagiti opisyales ti barangay, mangrugrugi ti operasyon ti nasao nga slaughterhouse iti alas dose iti tengngat rabii agingga iti alas kwatro ti parbangon a mangituntunda iti panakadistorbo dagiti matmaturog iti aglawlaw a babbalay.
Nailanad pay iti resolusyon a mangituntunda ti pagpartian iti nabangsit nga angin a mangap-apektar iti salun-at dagiti maseknan a residente.
Mairekreklamo met ti panakadadael dagiti sanikua dagiti umili sadiay gapu iti panaglabas dagiti dadakkel a trak iti pribado ken nailet a kalsada a sumrek sadiay.
Naawat ken inaprobaran met ti Sangguniang Bayan ti munisipyo ti nasao a resolusyon.
