Nangrugin idi kalman ti operasyon ti Molecular Testing Laboratory sadiay Benguet General Hospital (BeGH) kalpasan nga impaay ti Department of Health ti License to Operate ti pasilidad idi napalabas a lawas.
Inawat ti laboratoryo iti pitopulo ket uppat a swab samples manipod iti BeGH ken dadduma a munisipyo ti Benguet para iti panakaipasidong dagitoy iti panagsukimat.
Naamuan a dumanon iti 2,700 agingga 2,800 nga specimens ti binulan a mabalin a maakomadar ti nasao a laboratoryo.
Nupay kasta, inlawlawag ni BeGH Acting Chief Dr. Meliarazon Dulay a posible pay a manayunan dagiti bilang ti specimens a maakomadar ti laboratoryo apaman a malpas ti panagsanay dagiti dadduma a medical technologists sadiay ken maawatda ti donasyon ti Department of Health nga RT-PCR machine.
Iti agdama ket adda ti sangapulo a personnel ti nasao a laboratoryo.
