BAGUIO CITY — Impasardengen ni Environmental Secretary Roy Cimatu ti implementasyon ti Oplan Itogon a paset ti impaulogna nga stoppage order a mangipaspasardeng iti amin ng operasyon ti small scale mining iti entero a Cordillera.
Iti panakiyuman ti Bombo Radyo Baguio kenni Presidential Communications Operations Office Assistant Secretary Ana Marie Banaag, kinunana nga indanunna kenni Sec. Cimatu dagiti naawatna a pakaseknan ken apela dagiti kapamilya dagiti minero nga apektado sadiay Itogon.
Kinunana a naka-awat met daytoy ti napartak ken positibo a feedback manipud kenni Sec. Cimatu a mangibagbaga a pinasardengnan dagiti operasyon ti Task Force Itogon.
Nakalanad pay iti feedback ni Sec. Cimatu ti panagturonga ditoy Baguio City kalpasan ti dry-run opening ti Boracay Island inton October 16.
Naituding pay a kataripnong ni Sec. Cimatu dagiti minero ken mangnamnama daytoy a mailukaten ti Minahang Bayan tapnu agbalin a legal ita ti small scale mining.
Inyapelana pay ti panangrespeto dagiti minero iti stoppage order bayat nga awan pay ti naipaulog a pagalagadan para iti Minahang Bayan.
Kinuna ni ASec. Banaag a nasken pay nga ag-uray biit dagiti minero bayat nga awan pay ti konsultasyonda kenni Sec. Cimatu para iti panakabukel dagiti kasayaatan a wagas iti implementasyon ti Minahang Bayan.
Kabayatanna, dakkel ti nagbalin nga akem ti maysa nga anak ti minero sadiay Itogon, Benguet iti panakaipaka-ammo ti damag nga impasardengen ni Environment Secretary Roy Cimatu iti implementasyon ti Oplan Itogon.
Iti post ni Marben Tanacio Orfiano manipud Nagawa, Ampucao, Itogon, Benguet iti social media account daytoy, makita dagiti screenshots ti nagbalin a saritaanda kenni PCOO Assistant Secretary Ana Marie Banaag a nangidanunanna kadagiti pakaseknan dagiti minero ken pamilya dagitoy sadiay Itogon.
Indanunna kenni ASec. Banaag dagiti kasasaad dagiti minero ken pamilyada nga apektado iti panakaipasardeng ti panagminas ken iti panakakumpiskar dagiti gold ores wenno naba ken mining equipment dagitoy.
Iti panakiyuman ti Bombo Radyo kenni Orfiano a maysa nga specialist biomedical scientist-clinical biochemist ti Barts Health NHS Trust-Royal London Hospital, kinunana nga indanunna kenni ASec. Banaag ti apela ken pakaseknan dagiti minero sadiay Itogon gaputa ti mismo nga amana ket maysa a minero.
Kinunana nga iti panagtawagna kadagiti kabagianna sadiay Itogon ket naamuanna ti kasasaad dagitoy, pakairamanan ti posibilidad a saan a panagtuloy dagiti estudyante gapu iti kinakurang ti kwarta ken ti panakapukaw ti panggedan sadiay.
Inyunay-unayna a ti panagminas ti pagbiagan dagiti kaaduan nga umili ti Itogon ken nagbalin payen a biag ken kultura ti panagminas sadiay nga isu met ti nangbukel kadagiti komunidad.
Dinakamatna a naam-ammona ni ASec. Banaag idi napan ti nasao nga opisyal sadiay London.
Innayonna a ti nasao nga opisyal ti nakitana a mabalin a dagus a mangidanun iti pakaseknan dagiti minero kadagiti maseknan nga opisyal iti nasyonal a gobyerno.
Nagyaman pay daytoy gapu iti napartak a panagkamang ni ASec. Banaag kenni Sec. Cimatu.
