BAGUIO CITY – Nawaswasen ti temporaryo a panakairikep ken ti panakasuspindir ti operasyon ti slaughterhouse ti siudad ti Baguio ken ti livestock market para kadagiti baboy ken kalding babaen iti Executive Order No. 145 ni Mayor Benjamin Magalong.
Nupay kasta, mairikep ti pagpartian, ti lechonan ken ti livestock market para kadagiti baboy ken kalding tunggal aldaw ti Miyerkoles ken Dominggo para iti general sanitation ken disinfection.
Nailanad pay iti pammilin a nasken nga ipakita dagiti amin a livestock dealers, drivers, haulers ken butchers ti negatibo a resulta ti RT-PCR tests dagitoy sakbayda a mapalubusan a sumrek iti pagpartian ti siudad.
Nasken pay a maipasidongda iti to rapid antigen sakbay wenno iti mismo a maika-25 nga aldaw ti tunggal sumaruno a bulan.
Nakalanad iti pammilin nga iti laeng alas-11 ti agsapa agingga alas-8 ti rabii nga agawat ti slaughterhouse kadagiti maparti a dingwen.
Sagudayen pay ti pammilin dagiti dadduma a pagalagadan a nasken a suruten dagiti stakeholders iti pagpartian ti siudad.
