BAGUIO CITY – Temporaryo a mairikep dagiti isolation centers ti Baguio City mangrugi inton tapos, November 30.
Sigun kenni City Health Officer Dr. Rowena Galpo, gapu daytoy iti agtultuloy a panagbaba ti bilang dagiti agpospositibo ti COVID-19 ditoy siudad.
Kinunana a karaman kadagiti mairikep wenno agsardeng ti operasyon ti Roxas Hall ken Romulo Hall ti Baguio Teacher’s Camp; ti Laurel Dorm 2 ken ti Ferionni Apartment.
Inlawlawagna a babaen iti temporaryo a panakairikep dagiti nasao a pasilidad ket ad-adda maka-inot ti lokal a gobyerno ti Baguio iti maintenance ken operasyon dagitoy.
Nupay kasta, agtalinaed ti operasyon ti Community Isolation Unit iti sigud a Santo Niño Hospital; ti central traige quarantine unit iti Baguio Convention Center ken ti quarantine facility iti Magsaysay Hall sadiay Teacher’s Camp.
Iti agdama ket dumanon iti 5.67% ti occupancy rate dagiti isolation units ti siudad a maibilang a ‘safe zone’.
Daytoy met ti nagbalin a basaran dagiti otoridad tapnu ipaayda ti pangngeddeng iti temporaryo a panakairikep ti operasyon dagiti napili nga isolation centers.
