BAGUIO CITY – Naiparikep ken naipasardeng ti operasyon ti tallo a hydropower plants ti HEDCOR, Incorporated a masarakan sadiay Bakun, Benguet idi kalman babaen iti bileg ti naiserbi a Cease and Desist Order nga impaulog ti National Commission on Indigenous Peoples (NCIP) – Cordillera.
Nagramot ti panakaipaulog ti Cease and Desist Order kalpasan a kinedngan ti en banc ti NCIP a balido ti kiddaw dagiti nainsigudan nga umili ti Bakun, Benguet para iti panakaipaulog ti nasao a pammilin kontra iti nagtultuloy nga operasyon ti 2.4 megawatt Lower Labay Hydroelectric Power Plant, 6.4 megawatt F. L. Singit Hydroelectric Power Plant ken 3.6 megawatt Lon-oy Hydroelectric Power Plant ti HEDCOR, Incorporated.
Nakiddaw ti nasao a pammilin gapu iti kinakurang ti maikalkalikagum a Free, Prior and Informed Consent (FPIC) ken Certification Precondition.
Nailanad iti Cease and Desist Order a nagpaso idi Marso 2018 ti operating contracts dagiti tallo a power plants kalpasan ti 25 a tawen nga operasyon dagitoy ken idi nag-renew ti kompanya iti kaskenan a permit ket inyendorso daytoy ti Department of Energy iti NCIP para iti FPIC ken Certification Precondition.
Naisayangkat ti FPIC ngem nangipaulog dagiti umili ti Bakun ti resolution of non-consent iti renewal ti operasyon dagiti tallo a planta gapu iti saanda a panagtunos iti isyu ti royalty ngem nag-apela ti HEDCOR para iti panangikonsidera manen dagiti umili.
Napagnumuan dagiti umili iti community assembly dagitoy ti panangisanodda iti resolution of non-consent isut gapuna a naituloy ti negosasyon a nagresulta iti panangipaulogda iti resolution of consent ken panakapirma ti Memoradum of Agreement (MOA) idi Oktobre 2019.
Nupay kasta, idi Marso ti agdama a tawen ket naawat ti NCIP ti resolusyon dagiti elders/leaders a mangibagbagi kadagiti nainsigudan nga umili ti Bakun a nangwaswas iti MOA gapu iti maatap nga iregularidad, panangaramat ti HEDCOR iti nasao a MOA tapnu agtungpal ti Bakun LGU iti kayatda a mapasamak ken dagiti terms and conditions ti MOA ket ad-adda a pagdaksan dagiti umili ti ancestral domain ti Bakun.
Simmaruno a naawat ti NCIP ti resolution of non-consent dagiti umili gapu iti kapada a rason ken ti resolusyon dagitoy a mangkidkiddaw iti panakaipaulog ti Cease and Desist Order.
Nangisayangkat ti imbestigasyon ti NCIP ken sadiay a naduktalanda ti pudno a takder dagiti maseknan a nainsigudan nga umili ti Bakun ken sadiay a sinuratanda ti HEDCOR ken indanunda ti pinal a desisyon dagiti umili a nangibasura power plant projects ken iti obligasyon ti kompanya a mangisubli kadagiti umili iti paset ti lote a pakasarakan kadagiti planta.
Impalubos met ti NCIP Commission En Banc ti panakaipaulog ti Cease and Desist Order kalpasan ti panangadalda kadagiti impormasyon ti kaso.
Naipaayan met ti HEDCOR, Incorporated iti lima nga aldaw a mangileppas iti operasyon dagiti nasao a planta ken iti panangimuntarda iti safety protocols tapnu saan nga agpeggad dagiti maseknan a komunidad.
Mawaswas laeng ti Cease and Desist Order no makaiparang ti nasao a korporasyon iti pammaneknek a nakaalada ti FPIC ken Certification Precondition kas maitunos iti linteg.
