Kidkiddawen ti Sangguniang Bayan (SB) ti Sagada,Mountain Province a mairaman ni Eduardo Masferre, ama ti Philippine Photography, iti linia ti National Artists iti Pilipinas.
Iti resolusion, bigbigen dagiti konsehal ni Masferre gapu kadagiti kontribusionna iti tay-ak ti “photography” ken ti dokumentasionna iti indigenous cultural communities (ICC) ken kadagiti “indigenous peoples”(IPs) wenno agtutubo nangruna idiay Sagada.
Mabuya ti ladawana a pinicture ni Masferre nu kasano ti panagbiag dagiti IP ken kasano ti kultura dagitoy.
Dagiti obra ti nasao nga indibidual ket nakagun-od ti pammadayaw manipod pay iti ballasiw-taaw ken nagbalin daytoy kas “icon” iti “photography.”
Dagiti inaramidna manipod tawen 1934 agingga 1956 ket naimprinta, nairuar ken na-exhibit iti namin-adu a daras, mapalokal man wenno iti ballasiw-taaw.
Nakalanad iti resolusion a ni Eduardo Masferre ket maipampannakel nga anak ti Sagada ken maysa nga adigi dagiti ICC wenno IPs nu sadinno indedikarna ti biagna babaen kadagiti panangala ti ladawan iti nasao a lugar.
Nakakabil pay iti resolusion a dagiti aramid ni Masferre ket nagbalin a riyaw wenno boses tapno maamuan ken ad-adda a maapresiar ti naisangsangayan a wagas ti panagbiag idiay Sagada, Mt. Province.
Ti resolusion ket naiyendorso kenni Sagada Mayor Felicito Dula.
Naotorisaan daytoy a manginominar kenni Masferre tapno agbalin a maysa kadagiti National Artists iti National Commission on Culture and the Arts.
Ni Masferre ket naiyanak idiay Sagada idi April 18, 1909.
Ti amana ket maysa a soldado nga Espaniol a nangpili nga agtalinaed idiay Sagada.
Pimmusay ni Masferre idi June 24, 1995.
