Posible a sumango iti permanente a panangiparit iti panag-iggem iti public position ti maysa nga opisyal iti gobierno a mapaneknekan a nangibaon iti maysa a tao nga agaramid iti perjury nangruna no adda iti sidong ti sapata sigun kenni Sen. Panfilo “Ping” Lacson.
Sigun kenni Lacson, mabalin nga agbalin a principal iti krimen ti maysa nga inidbidual a direkta a nangibaon iti maysa pay nga inidibidual a mangaramid iti perjury, maibasar kadagiti probisyon iti Revised Penal Code (RPC) mainaig iti conspiracy ken dadduma pay a principal iti krimen.
Impeksa iti senador a maibasar iti Article 8 iti RPC, addaan iti conspiracy no dua wenno nasurok pay a tao ti immanamong nga agaramid iti krimen ken inkeddengda nga itungpal daytoy.
Kabayatannna, iti Article 17, mairaman kadagiti maikonsidera a principal dagiti tao a “directly force or induce others to commit” .
Kagiddan dayta, impaganetget pay ni Sen. Lacson a mabalin a mapilaan iti reklamo para iti subordination of perjury da Sen. Rodante Marcoleta ken sigud a Rep. Michael Defensor maipapan iti mapapati a “coached” a testimonia ni sigud a marino a ni Orly Guteza.
Innayonna pay a mabalin a karaman iti mabalin a mangipila iti kaso ti Department of Justice (DOJ) ken Office of the Ombudsman gapu ta ti perjury ket maysa a public offense.//