Nasawi ang isang batang opisyal ng militar mula Kalinga habang pinamumunuan ang kanyang mga tauhan sa isang operasyon laban sa pinaghihinalaang mga miyembro ng New People’s Army (NPA) sa Occidental Mindoro noong Linggo, Marso 29.
Kinilala ang nasawi na si 2nd Lieutenant Dean Oyando, na nanguna sa pursuit operation ng 68th Infantry Battalion sa Sitio Salafay, Barangay Monteclaro sa bayan ng San Jose.
Ayon sa 2nd Infantry Division, nakasagupa ng mga tropa ng pamahalaan ang tinatayang 15 armadong rebelde, na nagresulta sa palitan ng putok na tumagal ng humigit-kumulang 20 minuto.
Dahil sa engkuwentro, nagtamo ng matinding sugat si Oyando na naging sanhi ng kanyang pagkamatay. Dalawa pang sundalo ang nasugatan at agad na isinugod sa AFP Medical Center para sa karampatang lunas.
Sa isang pahayag, nagbigay-pugay si Colonel Michael Aquino, hepe ng Public Affairs Office ng 2nd Infantry Division, sa nasawing opisyal. Inilarawan niya si Oyando bilang isang dedikadong lider, at binigyang-diin na ang kanyang sakripisyo ay patunay ng patuloy na pagsisikap ng militar na mapanatili ang kapayapaan at maprotektahan ang mga komunidad.
