BAGUIO CITY – Naduktalanen ti pakabigbigan ti opisyal nga utek wenno nagplano iti maysa kadagiti death threats a naawat ni Baguio City Mayor Benjamin Magalong.
Sigun kenkuana, nagasat daytoy ken dagiti imbestigador kadagiti naaw-awatna a death threats gaputa adu dagiti tattao nga agtultuloy a mangipapaay ti napapateg nga impormasyon iti kaso.
Kinunana a nabigbigen ti maysa kadagiti pangta a naawatna kalpasan nga indanunna kadagiti pagtaltalkanna nga opisyal ti pulisya dagiti naaw-awatna a pangta.
Innayon ti sigud a dadaulo ti PNP-CIDG nga agtultuloy ti panag-anop dagiti otoridad kadagiti agpangpangta iti biagna tapnu maipasigurado a saan a matungpal ti dakes a plano dagitoy.
Pagyamyamanan pay ti mayor ti killaat a panagsardeng dagiti maaw-awatna a banta iti biag, partikular iti awag ken text messages.
Maipalagip a dinakamatna nga adda ti naawatna nga impormasyon nga adda ti nangkontak iti maysa a hitman para iti panakapuntiryana.