Nalaos ti ragsak dagiti opisyales kasta met dagiti residente ti Barangay South Drive kalpasan a napili daytoy kas “livable community.”
Iti panakiuman ti Bombo Radyo kenni Leonila Loreto, kapitan ti Barangay South Drive, kinunana a saanda a ninamnama daytoy a pammadayaw a naawatda bayat nga impeksana nga ar-aramidenda laeng ti responsibilidad dagitoy.
Sigun kenni Loreto, dagiti criteria a nausar iti panagadal para iti panagbalin a livable community ket pakairamanan ti health centers, pagtaudan ti taraon, kinatalged ken seguridad, kinaadda ti kayo, espasyo, community gathering, children’s park, garden, ken daduma pay.
Maibasar iti insayangkat a panagadal ti City Planning Development and Sustainability Office, ti Barangay South Drive ti napili kas “livable community” manipud kadagiti 128 a barangay iti siudad ti Baguio bayat a ti Barangay Lower Dagsian ken San Antonio Village ti nabigbig kas “declining livability.”
Dumanon met iti uppat a pulo ket maysa a barangay ti “moderately livable” ken ti nabatbati a walo pulo ket uppat ket “minimum livability compliance.”
Kabayatanna, kinuna Loreto a dakkel ti nagbalin nga akem dagiti residente para iti panakabigbig ti barangayda kas “livable community” gapu iti koordinasyonda tunggal maipatungpal ti clean-up drive, wagas tapno mapatalinaed ti kinadalus ken kinapintas ti nasao a barangay.
