Inwaragawag ni impeachment court spokesperson Regie Tongol idi Martes a mabalin a maisayangkat ti oral arguments no agkiddaw ti House prosecution panel iti subpoena tapno mapilit ni Vice President Sara Duterte nga agtestigo iti bukodna nga impeachment trial.
Daytoy ket saruno ti inwaragawag ni private prosecutor Lorna Kapunan a panggep ti prosecution a kiddawen nga agserbi kas witness stand ni Duterte tapno pasingkedanna nga awan ti basol daytoy.
Nupay kasta, kinuna ni Atty. Kapunan a saanda paylaeng a kidkiddawen iti Senate impeachment court ti subpoena para iti Bise Presidente.
Sigun kenni Tongol, agsusupadi ti panangmatmat ti prosekusion ken depensa iti daytoy a banag.
Sigun iti depensa, ti panagkiddaw iti panagparang ni Duterte iti impeachment trial ket maikontra iti self-incrimination.
Kabayatanna, inaklon ni Tongol a nalaklaka no boluntario laeng a dumar-ay ni Duterte a kas iti inaramid ni sigud a Chief Justice Renato Corona.
Nupay kasta, impaganetgetna a ti pangngeddeng ket adda latta ti bise presidente.
