Maangay ita nga aldaw iti Session Hall, Supreme Court Baguio Compound, Baguio City ti “oral arguments” para iti petision mainaig iti pannakaiyakar ti sobra a pondo ti Philippine Health Insurance Corporation wenno PhilHealth iti national treasury, sigun iti pannakangiwat ti Korte Suprema a ni Atty. Camille nga immunan nga inwarawagagna idi Marso a singko.
Ti oral arguments ket agbayag agingga inton Abril a kuatro, iti agdama a tawen.
Immunan nga imbilin ti Korte Suprema kenni House committee on appropriations chairperson Stella Quimbo ken kameng ti technical working group a makipaset wenno tumabuno daytoy iti oral arguments maipapan iti 2025 General Appropriations Act wenno GAA.
Maipalagip a nangipila ti umuna a petision ni sigud nga executive secretary and senatorial candidate Vic Rodriguez ken dadduma pay nga indibidual a mangkidkiddaw iti Korte Suprema nga ideklara ti 2025 national budget kas “unconstitutional” wenno panaglabsing iti konstitusion gapu iti mapapati nga iregularidad ken blangko nga “items” iti bicameral conference committee report.
Dagiti kadua ni Rodriguez a nagpetision ket da Davao City 3rd District Representative Isidro Ungab, Rogelio Mendoza, Benito Ching Jr., Redemberto Villanueva, Roseller dela Peña, Santos Catubay, ken Dominic Solis.
Ti maikadua a petision ket impila ti 1Sambayan Coalition, Sanlakas, Advocates for National Interest, ken sumagmamano a grupo, bayat nga ti maikatlo a nangipila ket ti Teachers’ Dignity Coalition (TDC), Freedom From Debt Coalition ken ti Philippine Alliance of Human Rights Advocates,
Ikalkalintegan dagiti “petitioners” a ti General Appropriations Act wenno GAA ket saan a maitunos iti konstitusion gapu iti saan a panangituding iti “mandatory funding” para iti PhilHealth, saan a nainkalintegan a panangipangato kadagiti appropriations iti labes dagiti rekomendasion ti Presidente, ken panangilatang iti kangatuan a badyet iti imprastruktura imbes nga edukasion.
Dagiti “respondents” iti petision ket da President Ferdinand Marcos Jr., Executive Secretary Lucas Bersamin, Senado, ken ti House of Representatives.
Kabayatanna, nakasaganan a mangisayangkat ti protesta dagiti nagduduma a grupo nangruna dagiti progresibo a grupo iti sanguanan ti Korte Suprema iti siudad ti Baguio.
Aguumong dagitoy iti oras ti alas siete trenta ita nga agsapa, ken mangrugi ti protestada iti alas otso.
Iti interview ti Bombo Radyo iti maysa kadagiti kameng ti progresibo a grupo, kinunana a karaman kadagiti kakaduada a mangisayangkat ti protesta ket ti Bayan Muna, Health Alliance for Democracy, Alliance of Health Workers, Tongtongan ti Umili, ken daddum pay a grupo.//
