BAGUIO CITY – Maisaksakad sadiay lokal a konseho ti ordinansa mang-institutionalize iti panakaaramat dagiti hotline numbers ti pulisia a mabalin a kontaken dagiti umili ti siudad iti pakaseknan dagitoy kontra iti panagabuso.
Nailanad iti maisaksakad a linteg a pinutar ni Councilor Maria Mylen Victoria Yaranon ti hotline numbers ti Baguio City Police Office-Women and Children’s Protection Desk a 661-1483, 0930-006-7779, ken 0930-1893-595.
Malaksid iti panagabuso kadagiti babbai ken ubbing, maakomodar metlaeng iti hotline number dagiti insidente ti gender based violence (GBV) wenno ti pangidumduma gapu iti gender.
Naamuan a paset daytoy ti panakaamiendar ti Ordinance Number 120, Series of 2018 ti siudad a mangbilbilin kadagiti babbarangay ti siudad a mangibangon iti bukodda a VAWC desk.
Iti kanito nga agbalin a linteg, manamnama a matutukan pay dagiti kaso ti siudad seknan iti VAWC, VAW, ken GBV.
Naaprubaran met daytoyen iti umuna a panakabasa sadiay lokal a konseho ken naipaiman iti Committee on Social Services, Women, and Urban Poor
Kabayatana, dumanon iti 34 a kaso ti panagabuso ti nailista ditoy siudad ti Baguio iti uneg ti tallo a bulan.
Sigun kenni Wynona Tugade, statistician ti Baguio City Police Office-Women and Children’s Protection Desk (BCPO-WCPD), nailistada ti nasao a bilang dagiti kaso manipud Enero agingga’t Marso ti agdama a tawen.
Manipud iti pakabuklan a bilang, 19 kadagitoy ti kaso ti Violence against Women and Children wenno VAWC-related cases bayat a dagiti dadduma ket karaman iti kaso ti “gender-based violence” (GBV).
Immuna metten a naibilin kadagiti 128 a babbarangay ti siudad ti panangibangonda iti bukodda a VAWC desk a mabalin a pagturongan dagiti maseknan tapno maipaayan iti dagos nga aksion.
