BAGUIO CITY–Inaprobaran ti lokal a konseho ti Baguio City ti ordinansa a mangkidkiddaw iti panakapabaliw iti paka-aramatan ti pondo para iti subsidiya dagiti Public Utility Jeepney drivers ditoy lokalidad.
Sigun kenni City Administrator Engineer Bonifacio Dela Peña, dumanon iti nasurok P18-M a gatad manipod iti subsidiya dagiti jeepney drivers ti maiyakar para kadagiti napapateg a proyekto ti siudad.
Kinunana a karaman kadagiti priyoridad a proyekto iti ordinansa ti panakaimuntar dagiti bicycle lanes, panakaipasdek ti rangtay iti Dizon Subdivision Barangay, panakaimuntar ti electrical system iti staging area ti basura sadiay Marcos Highway ken dadduma pay.
Dinakamatna pay ti opisyal a saanen nga agipaay ti lokal a gobierno iti tulong pinansial kadagiti parapubliko a jeep ita a naipasidong ti siudad iti modified general community quarantine.
