BAGUIO CITY–Inaprobaran ti Sangguniang Bayan ti La Trinidad, Benguet ti ordinansa a mangipapaay iti 90-day a rental holiday kadagiti negosyante nga agab-abang iti establishemento, units ken espasyo a tagikua ti munisipyo.
Nailanad iti ordinansa nga impila ni Councilor Nestor “Bobot” Fongwan Jr. a saan nga agbayad iti abang dagiti maseknan a negosynte nangruna dagiti apektado iti community quarantine.
Sigun iti konsehal, immunan a nagkiddaw iti konsiderasyon dagiti negosyante nga apektado iti pandemya.
Gapu iti daytoy, mabalin nga aramaten dagiti tenants a nagbayad iti abangda idi Enero agingga Agosto ti binayadanda a bulan inton Setyembre agingga inton Oktubre.
Kabayatana, naipasa met iti Sangguniang Bayan ti nasao nga ili ti resolusyon a mangkidkiddaw kadagiti landlords nga ikonsidera dagiti tenants dagitoy ita a krisis baaben iti naibaba a babayadan dagitoy iti abang.
