BAGUIO CITY – Ad-adalen ita ti Baguio City Council ti singasing nga ordinansa a mangiparparit kadagiti gambling-related companies wenno kompanya nga adda pakainaiganna iti sugal nga agsponsor, agpromote ken makipaset kadagiti festival ken public celebration iti siudad.
Impila da Councilor Van Oliver Dicang ken Yuri Weygan, kadwada ni Sangguniang Kabataan Federation President John Rhey Mananeng ti nasao a singasing nga ordinansa tapno mapagtalinaed ti urnos iti pamilya ken maprotektaran dagiti ubbing kasta metten dagiti dadduma pay a vulnerable sector kontra iti impluwensiya ti sugal
Iti sidong ti ordinansa, saklawen ti“gambling entity” ti asinuman nga indibidwal wenno organisasyon nga agay-ayam iti aniaman a kita ti sugal pakairamanan dagiti casino, online betting platforms, e-games, ken lotteries malaksid laeng nu imanmanehar ti gobierno para iti pagsayaatan ti kagimongan.
Maiparparit kadagiti nasao a kompanya nga ag-sponsor kadagiti event, agikabil iti logo wenno promotional materials, agipatakder iti booth wenno stall, ken makipag-partner kadagiti aktibidad.
Iti kanito a maaprubaran ti nasao nga ordinansa, kasapulan daytoy nga ipatungpal ti Baguio City Tourism Office, opisina ti Mayor ken dadduma pay nga event organizers.
Kabayatanna, adalen ti City Legal Office dagiti kontrata ti sponsorship, ken mangipaay iti guidance ti City Social Welfare and Development Office maipapan iti posible nga epekto daytoy iti komunidad.
Mabalin met a saan a patgan wenno ibabawi ti Permits and Licensing Division ti permit dagiti event nga aglabsing iti daytoy.
Adda met dagiti agur-uray a pannusa kadagiti violators. Iti 1st offense, maballaagan ken makanselar ti permit bayat nga iti second offense ket mamulta iti dua ribu a piso agingga lima ribu a piso, makanselar ti event ken mapawilan nga ag-organize iti event iti uneg ti maysa a tawen.
Para met iti 3rd offense ken kadagiti sumarsaruno pay a panaglabsing, mamulta iti lima ribu a piso, makanselar ti event ken permante a saanen a maka-organize iti event iti siudad.
Mabalin metlaeng a maiwaragawag ti nagan dagiti organizer ken kompanya nga aglabsing.
Naaprubaran ti singasing nga ordinansa iti umuna a pannakaibasana iti konseho ken manarimaan a reprepasoen ti Committee on Laws and Governance.
