BAGUIO CITY – Pinirmaanen ti mayor ti Baguio ti City Ordinance No. 04, series of 2022 a mangitudtuding kadagiti pagalagadan para iti implementasyon ti parking rules kadagiti 128 a barangay ti siudad.
Nailanad iti ordinansa a mabalin nga agsingir dagiti barangay ti parking fee kadagiti pasilidad a tagikua wenno imatmaton ti barangay ken ti gatad ti makolektar a parking fee ket agbasar iti aprobaran dagiti umili kabayatan ti barangay general assembly.
Ipalpalubos metlaeng ti ordinansa ti panangipataw dagiti barangay iti babayadan kadagiti mabigbig nga on-street parking sites iti barangay a maitunos iti standard rate.
Maibasar iti standard rate, mabalin nga agsingir ti barangay iti P35-P50 para iti umuna a tallo nga oras ken kanayonan a P10 tunggal sumarsaruno nga oras tunggal slot para iti day parking iti alas-siete ti agsapa agingga alas-nuebe ti rabii bayat a flat rate a P100 iti overnight parking manipud alas-siete ti rabii agingga alas-siete ti agsapa.
Nailanad pay iti ordinansa a mabalin nga innaldaw, linawas, binulan, tunggal maikatlo a bulan, tunggal kagudua ti tawen ken tinawen ti wagas ti panagbayad iti parking fee kadagiti pasilidad a tagikua wenno imatmaton ti barangay ken kadagiti nadesignar nga ‘on-street parking sites’.
Naiyunay-unay metlaeng iti ordinansa a nasken a masurot ti polisiya a “first come, first served basis”.
Maaramat kas ‘exclusive fund’ ti barangay ti makolektar a parking fee nupay ibaklayda ti bayad dagiti resibo nga agtaud iti lokal a gobyerno ti siudad.
Nailanad pay iti ordinansa nga awan ti basol ti barangay no adda man ti madadael wenno mapukaw kadagiti nakaparada a lugan.
Nabukel ti ordinansa kalpasan a naobserbaran ti lokal a konseho a nagduduma ti parking fee rates a nailanad kadgiti ordinansa nga insumsumitir dagiti barangay mainaig iti pagalagadan ti panagpara ken trapiko iti masakupan dagitoy.
