BAGUIO CITY — Naan-anayen a maiyemplementar inton bigat ditoy siudad ti Baguio ti City Ordinance No. 35 Series of 2017 wenno ti Plastic and Styrofoam Free Baguio Ordinance.
Sagudayen ti ordinansa a maipawil ti panagaramat dagiti amin a business establishments iti aniaman a plastic bag wenno styrofoam container kadagiti taraon ken komoditi a gatgatangen dagiti kustomer.
Saksakupen pay ti ordinansa adgiti amin a para publiko a pagadalan iti siudad ken dagiti ahensia wenno iopisina ti goberno.
Sigun kenni Vice Mayor Edison Bilog, agbalin latta nga epektibo ti nasao nga ordinansa inton bigat iti baet nga awan pay ti Implementing Rules and Regulations (IRR) daytoy.
Impettengna a nabayag ken kanayon ti panangipalagipda iti publiko ken kadagiti pasdek seknan iti ordinansa tapnu saan dagitoy a maklaat iti kanito a maimplementaren daytoy.
Innayon ni Bilog a nasken nga agtungpalda iti ordinnasa tapnu saanda a madusa ken agaramaten dagiti market-goers kadagiti bayong, ecobag wenno dadduma a banag a mabalin a maaramat iti panakitienda dagitoy.
Dinakamatna pay a babaen iti implementasyon ti ordinansa ket maksayan ti parikut ti siudad kadagiti plastik a basura.
