BAGUIO CITY – Naipasa iti umuna a panagbasa iti lokal a konseho ti Baguio ti singasing nga ordinansa a panakaisayangkat ti structural integrity audit kadagiti nangatngato a pasdek ditoy siudad.
Sigun kenni Councilor Leandro Yangot Jr., isayangkat ti City Engineering Office, City DRRM Council ken ti City Buildings and Architecture Office ti nasao a panagsukimat iti kinatalged dagiti amin a nangangato a pasdek iti siudad, partikular dagiti asideg kadagiti danger zones ken fault lines.
Kinunana a no naan-anay a maaprobaran ti ordinansa ket maiyemplementar daytoy ken masigurado ti kinatalged dagiti pasdek iti siudad a pagtatrabahuan dagiti adu a tattao ken makita pay no nakapasa dagitoy iti National Building Code.
Naamuan a responsable ti City Engineering Office iti panakasukimat ti kinatalged dagiti pasdek a tagikua ti lokal a gobyerno ken dagiti national line agencies bayat a ti City Buildings and Architecture Office ti mangsukimat iti kinatalged dagiti pasdek dagiti pribado nga agtagikua.
Bigbigen met ti City DRRM Council no ti lokasyon dagiti pasdek iti siudad ket adayo wenno asideg kadagiti danger zones ken fault lines.
Mapatawan met iti pannusa dagiti building owners a mapaay a mangtarimaan a naimbag iti pasdekda.
Panggep pay ti singasing a mapatibker ti resiliency ti siudad manipud kadagiti aniaman a kalamidad wenno didigra.
