BAGUIO CITY – Maitaltal-o ita dagiti organiko a produkto dagiti farmer-scholarship beneficiaries ti Technical Education and Skills Development Authority (TESDA)-Cordillera, kabinnadang ti tallo a training institutions daytoy iti Baguio City ken Benguet.
Sigun kenni TESDA-Benguet Provincial Director Vilma Cabrera, masarakan ita dagiti nasao a produkto iti trade fair iti kadakkelan a mall ditoy siudad ti Baguio nga agpaut agingga inton Dominggo, November 29.
Kinunana a ti trade fair ket paset ti panagbinnadangda iti nasao a mall para iti Kabalikat sa Kabuhayan Sustainable Agriculture Program tapnu matulongan dagiti mannalon a maka-adal kadagiti baro a wagas iti sektor ti agrikultura ken maital-oda dagiti produktoda.
Naamuan a 50 a mannalon ti benipisaryo iti nasao a programa ken naipasidong dagitoy iti libre a panagsanay ken naipaayanda ti allowance ken dadduma a benipisyo.
