BAGUIO CITY – Pinirmaanen ti ama ti siudad ti Baguio ti Memorandum 433, series of 2020 a nangipaay iti Original Proponent Status (OPS) iti SM Prime Holdings Incorporated (SMPI) para iti panakaisimpa ti Baguio City Public Market.
Nailanad iti memo ti pammalawag a saan a kompleto ti proposal ti Robinsons Land Corporation (RLP) gaputa saanda nga insumitir amin a maikalkalikagum a dokumento.
Maipalagip a ti proposal ti RLP ti inyendorso ti Public-Private Partnership for the People Initiative (P4) – Selection Committee secretariat.
Nailanad pay iti memo a saan a maipasigurado a ti proposal ti RLP ti mangited iti dakdakkel a bentahe ken benipisyo iti komunidad ken iti revenues para iti lokal a gobyerno no idilig iti proposal ti SMPI.
Nakita met a maitunos ti proposal ti SMPI iti kwalipikasyon tapnu maipasigurado ti siudad ti bentahe ken benipisyo iti komunidad ken iti revenues ti Baguio.
Nailanad pay iti memo a maipaay ti certificate of non-acceptance iti RLP.
