BAGUIO CITY – Maaddaan ti Cordillera iti natibtibker nga otonomiya ken napimpintas a polisiya para iti ancestral domain daytoy iti kanito nga agbalin a federal ti sistema ti gobyerno.
Sigun kenni DILG Assistant Secretary for Communication and Public Affairs Jonathan Malaya, panggep ti maisaksakad a pederalismo a mapabileg dagiti rehion ken babaen iti daytoy ket maipaayan iti partikular a lebel ti otonomiya ti amin a rehion iti pagilian, saan laeng a ti Cordillera.
Patienna pay a malawlawagan ti biddut a panagmatmat a punasen ti pederalismo ti agdama a probisyon iti linteg para iti otonomiya ti Cordillera.
Inlawlawag met ni Dr. Virgilio Bautista, miembro ti Consultative Committee a mangrepaso iti 1987 Constitution nga iti sidong ti maisaksakad a pederalismo ket ma-institutionalize wenno agbalin a paset ti konstitusyon ti otonomiya ti Cordillera.
Nupay kasta, patienna a nasken latta a maituloy ti kampanya a panakaisakad ti otonomiya ti Cordillera.
Innayonna nga iti udina ket aniaman ti mangun-una a maaprobaran, ti panggep ti dua a sistema ket ti panagbalin nga independent wenno self-governance ti rehion.
