Namnamaen ti Regional Development Council-Cordillera Chairman a mangngeg manipud kenni President Ferdinand Marcos Jr. ti otonomiya ti Rehiyon Cordillera iti panagbitlana iti maikapat nga State of the Nation Address daytoy inton July 28.
Kabayatan ti media interview kenni Apayao Governor Elias Bulut Jr.,Chairman iti Regional Development Council-Cordillera, kinunana a ti nasao a banag ti kangrunaan a kayatna a mangngeg manipud iti presidente gapu ta daytoy ket nabayagen a tartarigagayan dagiti umili iti rehiyon.
Malaksid iti dayta, maysa pay a kayatna a mangngeg manipud iti presidente ti Regional Development Trunk Line iti Northern Luzon partikular dagiti main railway route ken major transportation link.
Mangnamnama ni Bulut nga ita a gundaway ket mangngegna manipod iti presidente dagiti nagduduma a programa wenno proyekto ti national government para iti Northern Luzon agsipudta patienna a nabaybay-an ti nasao a parte ti pagilian a Pilipinas iti manon a tawen.
Kabayatanna, bayat ti selebrasyon ti 38th Cordillera Day , inyebkas ti opisyal ti kinapateg ti panagbalin ti Cordillera kas autonomous region para iti pannakapreserba ti kultura, ken aglawlaw iti rehiyon.//Bombo Genzel Depayso
