Agkidkiddaw ita ti MSWDO BGHMC ken ti kapulisan iti tulong manipud iti publiko para ti pannakabigbig ti lalake a naitaray iti ospital kalpasan nga awan ti nakitada nga anyaman a pakakitaan ti identity.
Sigun iti otoridad awan ti anyaman a nakitada a personal belongings ti biktima a pakabigbigan kuma daytoy.
Sigun iti report dagiti kapulisan, ti lalaki a biktima nga agingga ita ket saan pay laeng a nabigbigbig ket mapatta-patta nga agtawen iti 26-28, addaan height a 5’5″, brown-complexioned, ken nakakawes daytoy iti black t-shirt ken navy blue pants. Naaksidente daytoy iti motor iti asideg ti Baguio Memorial Cemetery, Naguilian Road, Baguio City. Sigun iti report, naireport ti insidente pasado alas onse ti rabii idi kalman babaen iti maysa a concerned citizen.
Nakalanad metlaeng iti imbestigasyon a ti motor nga inaramat ti biktima ket maysa a nangisit a SUZUKI nga addaan iti plate number 7471FJ.
Iti interview dagitoy iti dua a witness, bayat a magmagna dagitoy iti sidewalk ti Quirino Highway, Baguio City tapno agsapul ti water station, napansinda ti motor a napartak ti patarayna paturung iti city proper.
Apaman a nadanon ti biktima ti nasao a lugar, nakitadan daytoy a timmama iti road gutter ken nagbaliktad.
Gapu iti dayta, naipurwak ti biktima ken unconscious daytoyen.
Naitaray pay daytoy iti ospital babaen iti Baguio City Emergency Medical Services (BCEMS) ngem naideklara daytoy a dead on arrival.
Iti agdama, dukduktalen pay laeng dagiti kapulisan ti pakabigbigan ti biktima.
Mannarimaan metten ti beripikasyon ti Land Transportation Office (LTO) iti plaka ti motor tapno maamwan nu asino ti akintagikua iti daytoy, banag a posible a makatulong iti pannakabigbig ti biktima.
Kabayatanna, temporaryo met a naiturong iti opisina ti kapulisan ti motor nga aramat ti biktima para iti safekeeping. //Bombo Noveh Organo
