Natakaw ti dua a selpon ti 32- anyos a babae a residente ti Camp 7, Baguio City kalpasan nga inala daytoy ti saan pay a nabigbig a suspek a nangserrek iti pagtaengan daytoy.
Napasamak ti maatap nga akyat-bahay parbangon, itay nabiit idiay Richgate, Camp 7, Baguio City.
Iti inisyal nga imbestigasyon dagiti otoridad, sinumrek ti suspek iti maikadua a kadsaaran ti pagtaengan no sadino saan a naka-lock ti sliding window daytoy.
Apaman nga adda daytoy iti uneg ti kuwarto, innala ti suspek ti dua a selpon a nakaparabaw iti katre nga addaan iti pakabuklan a gatad nga P124,999.00.
Kalpasanna, maatap a rinumwar daytoy iti isu metlaeng a tawa kalpasan a naalana daggiti nasao a selpon.
Naiproseso met ti crime scene ngem awan ti naala dagitoy a finger print.
Kabayatanna, agpalpalagip met dagiti otoridad iti publiko nga isara ken siguraduenda a nakalock dagiti ruangan ken tawa da, agi-install ti CCTB no kabaelan, ken agikabil iti silaw kadagiti nasipnget a suli ti pagtaengan tapno saan a mabiktima iti akyat bahay wenno panagtakaw. //Bombo Noveh Organo
