Nangbukel ti lokal a gobierno ti La Trinidad iti Anti-Vegetable Sabotage Task Force para iti pananginspeksion kadagiti produkto, nangruna kadagiti maatap nga smuggled a nateng iti probinsya ti Benguet.
Panggep ti task force nga imonitor ken sukimaten dagiti produkto a mailako iti munisipyo tapno maliklikan ti panagwaras dagiti smuggled vegetables iti lokal a merkado.
Maipalagip a nangisayangkat ti task force iti inspeksion sadiay La Trinidad Vegetable Trading Post, Benguet Trading Pinoy Agri Center, ken Strawberry Farm Backfill Area, a paset ti Tourism Pasalubong Area iti Strawberry Farm.
Iti nasao nga inspeksion, naduktalan dagiti sumagmamano a maatap nga smuggled broccoli sadiay La Trinidad Vegetable Trading Post ken Strawberry Farm Backfill Area.
Sigun kenni Agot Balanoy, adviser ti League of Associations iti La Trinidad Vegetable Trading Post, uray adda ti tulong ti task force, saan latta a naan-anay ti pannakaileppas ti problema gapu ta inspeksion laeng ti mabalin nga aramiden dagitoy ket awan ti autoridadda a mangkumpiskar kadagiti maatap nga smuggled products.
Innayonna pay a kasapulan ti pannakipaset ti Bureau of Plant Industry (BPI), agsipudta dagitoy ti addaan iti karbengan a manginspeksion kadagiti warehouse dagiti maatap nga smuggled vegetables.
Kabayatanna, impeksa ni Balanoy nga awan ti naipaay a konkreto a tulong, solusyon, ken plano manipud iti national government tapno marisut ti problema iti panagserrek dagiti smuggled vegetables iti probinsya.
Sigun kenkuana, napateg ti napartak ken natibker a panagtitinnulong dagiti lokal ken nasyonal nga ahensya tapno masigurado a marisut ti pakaseknan ken masalakniban dagiti lokal a vegetable farmers ken dagiti lehitimo a negosyante.
Inlawlawag ti nasao nga opisial a ti epektibo nga aksyon kontra iti smuggling ket makatulong iti panangsalaknib iti pagbiagan dagiti lokal a mannalon ken iti patas a kompetisyon iti merkado.
Iti sabali a bangir, impalagip ni Balanoy kadagiti konsumer a suportaran dagiti lokal a produkto tapno matulungan dagiti mannalon iti probinsiya ti Benguet.//Bombo Khey Reparip
