BAGUIO CITY – Nabigbigen dagiti outstanding performers iti tay-ak ti nutrition program management iti rehiyon Cordillera.
Sigun kenni Candice Willy, chairperson ti Regional Nutrition Evaluation Team – Cordillera, naibasaar daytoy iti resulta ti Monitoring and Evaluation of Local Level Plan Implementation ken iti 2017 Search for the Regional Outstanding Barangay Nutrition Scholar.
Kinunana a ti 2018 Green Banner Awardee iti provincial level ken ti probinsia ti Benguet bayat a ti 2018 Green Banner Awardee iti municipal level ket ti munisipyo ti Tublay.
Sigun kenkuana, awan ti nangabak iti city level gaputa napaay ti Tabuk City a manggun-od iti cut-off score bayat a ti Baguio City ket maipaspasidongen iti evaluation babaen iti National Nutrition Evaluation Team.
Nabigbig met kas 2017 Regional Outstanding Barangay Nutrition Scholar ni Imelda Dagupon manipud Barangay Imelda Village, Baguio City bayat a maikadua ni Divina Guilanda manipud Barangay Sagpat, Kibungan, Benguet; maikatlo ni Maribel Bu-ucan manipud Poblacion East, Lamut, Ifugao; maikapat ni Florita Agulin manipud Barangay Bawaan, Balbalan, Kalinga ken maikalima ni Guillerma Wagsingan manipud Barangay Tuga, Tabuk City.
Mangnamnamada nga agserbi dagiti pammigbig nga inspirasyon kadagiti dadduma pay tapnu pasayaatenda ti ipapaayda a tulong tapnu maksayan ti malnutrisyon iti rehion Cordillera.
Naituding met a maipasidong iti validation ti nasao a resulta babaen iti National Nutrition Evaluation Team.
